CHE JAZMÍN
Nde poty morotîmíre che jazmínpe rohenóiva
ha mamo rohechahápe hi'aitéva rohetû.
Remimbígui pyharérõ ñasaindýndie rejoapíva
ha je aipo che angatarãnte ko yvy ári nde reju.
Rehayhúgui opurahéiva kyre'ÿ ha avañe'ême
rehayhúgui che ahayhúva PARAGUÁI ÑANE RETÃ
péina ãga ndeveháma rohypýi che ñangekóipe
ha aniangákena ojupénte tesaráipe japyta.
Ndehegui ko che arekóma peteî mba'e hepýva
ha oje'ove'yva'erãma che py'águi marõve.
Pytumby ñane añohápe mborayhu hypyvehára
Ñoavi'u juru pytépe ñame'ê vaekue ojupe.
Pe vy'a upérõ guare ko che ñe'ãgui ndopivéiva
ha amanoha ára ohóne yvyguýpe chendive.
Pevarãpa jaipotáne pe mayma ohecha ramóva
pevarãpa Ñandejára mborayhu cheve ome'ê.
Teodoro Salvador Mongelós
Este texto nos fue facilitado por Duilio S. Núñez P. Aguyjeveterei mante!
Diese Seite wurde erstellt von Wolf Lustig (lustig@mzdmza.zdv.uni-mainz.de).
Letzte Aktualisierung am 06.03.96.
| 
